Манчестер Сити победи со 2:1 против Лидс и дојде на чекор до новата титула англиски шампион, а Ерлинг Халанд на крајот од натпреварот го налути менаџерот Пеп Гвардиола.
Несогласувањата ги подгреа пенал кој Сити го имаше при водство од 2:0. Халанд му ја препушти егзекуцијата на Илкај Гундоган, кој на тој начин доби можност да го комплетира хет-трикот. Менаџерот сакаше Халанд да го изведе ударот, а дополнително се налути кога Гундоган го промаши пеналот.
Лидс подоцна ја намали негативата на 2:1.
„Да постигнеше Гундоган, се ќе беше во ред. Хет-трик, одлично, одиме понатаму… Но, изведувачот е изведувач. На 2:0 тоа е работа, особено во англиската лига. Не е ситуација во која можеш да заборавиш кој ги изведува пеналите, не можеш да го направиш тоа“, изјави Гвардиола и продолжи:
„Во Англија играта не е завршена на 2:0. Ако беше 4:0 и 10 минути до крајот, тогаш ОК… Сакав пеналот да го изведе играчот кој нормално го прави тоа. Тоа значи Халанд или Махрез. Сепак, и оваа ситуација покажува каква личност е Ерлинг. Сакаше да го израдува својот соиграч, покажа дека соиграчите му се многу важни. Го почитувам потегот на Халанд, но сепак тој требаше да го изведе пеналот бидејќи е специјалист за тоа“.
