Единаесет деца се повредени и се примени во градската болница во Скопје по новиот предизвик на социјалната мрежа „Тик ток“, а двe од нив се со скршеници на рацете, потврди за МИА в. д. директорот на Клиниката за хируршки болести „Св. Наум Охридски“, д-р Небојша Настов.
Како што посочи, децата се на возраст од 10 до 16 години и сите се од Скопје.
– Единаесет деца се примени во болницата заклучно со вчерашниот ден до 13 часот. Можно е и да има повеќе деца, но ова е она што ние го имаме како податок за механизам на повреда – вели Настов за МИА.
На новинарско прашање за каков предизвик станува збор, тој објасни дека станува збор за фрлање со испружени раце како што прави „Супермен“.
– Се испружаат рацете како што прави ликот „Супермен“. Групата го фаќа и го фрла предизвиканото момче или девојче во висина. Тоа е она што мене ми го објасниле. Не сум видел и не можам да кажам точно. Има и машки и женски деца – додаде Настов.
Тој апелира да не се прават во иднина вакви работи, затоа што може да завршат со сериозни последици.
– За среќа, од овие 11 деца, двајца се само со скршеници на рацете, другите се со набиеници. Но, ако ова продолжи, може да има пострашни повреди. Доколку детето падне на глава, ќе има потешки повреди – додаде Настов.
