Бактеријата која предизвикува чир може да се пренесе и на членовите на семејството
Кога гастроинтестиналните проблеми ја вклучуваат бактеријата Helicobacter Pylori (H. pylori), членовите на домаќинството на пациентот, исто така, треба да бидат прегледани за инфекција, покажа една кинеска студија.
Иако обично се асимптоматски, инфекциите на желудникот или на првиот дел од тенкото црево со H. pylori се најчестите причини за пептични улкуси.
H. pylori, исто така, може да предизвика гастритис, иритација на слузницата на желудникот и, во ретки случаи, ако не се лекува може да доведе до рак на желудникот.
Истражувачите во Кина ги тестирале сите членови на 10.735 семејства во 29 провинции за H. pylori. Меѓу 31.098 луѓе во студијата, откриено е дека приближно 43 отсто од возрасните и 21 отсто од децата и адолесцентите биле заразени, пренесува Ројтерс.
Само 29 отсто од семејствата немале инфекција. Сите преостанати 71 отсто имале најмалку еден заразен член, вклучително и 20 отсто од кои сите членови на семејството биле заразени, објавија истражувачите во списанието „Гут“.
Изложеноста на заразените членови на семејството е веројатно главниот извор на неговото ширење, претпоставуваат истражувачите.
Додека 14 отсто од децата и адолесцентите кои живеат со неинфицирани родители биле и самите заразени, таа стапка била 34 отсто кај децата кои живеат со двајца заразени родители.
Преваленцата на H. pylori е особено висока во Кина.
Според американскиот национален институт за дијабетес и дигестивни и бубрежни заболувања, инфекциите со H. pylori погодуваат 30 до 40 проценти од луѓето во САД. Најчесто, инфекцијата се стекнува во детството.
Истражувачите рекоа дека нивните наоди покажуваат дека штом на пациентот ќе му биде дијагностициран H. pylori, треба да се тестира целото семејство и да се лекуваат сите заразени членови. Инфекциите се елиминираат со антибиотици.
