,,Членот 118 од Уставот е прецизен и во него е утврдено дека меѓународните договори што се ратификувани се дел од внатрешниот поредок и не можат да се менуваат со закон”, рече министерот за правда Никола Тупанчески во интервју за А1.он, осврнувајќи се на прашањето за поднесената иницијатива на ВМРО ДПМНЕ за распишување задолжителен референдум за Договорот за добрососедство со Бугарија.
– Меѓународното право мора да се почитува, во спротивно, тоа би довело до отворање на Пандорината кутија. Дали еден меѓународен договор може да се суспендира со закон? Во однос на правната сигурност во една држава, Република Северна Македонија има потпишано многу билатерални и мултилатерлни договори. Тоа значи дека, како држава, можеме еднострано или врз основа на највисоката алатка на демократијата – референдум, да ги коригираме тие договори. Постои можност нашата држава еднострано да не го прифати тој договор, но начинот на кој треба да го направи не треба да биде онаков како што сега се прави – рече Тупанчески.
Министерот посочи дека рестриктивното толкување на Уставот е подобро, како што постапи претседателот на Собранието Талат Џафери.
– Се согласувам дека во ингеренциите на претседателот на Собранието влегува оценката на уредноста. Дали претседателот треба мериторно да ја оценува самата иницијатива, има две стојалишта. Да сум на местото на Џафери, би постапил исто затоа што, и да беше оставена таа иницијатива, дефинитивно ќе имаше луѓе кои ќе ја оспореа – рече министерот за правда Тупанчески.
