Генералниот секретар на НАТО, Јенс Столтенберг денеска и се обрати на јавноста, пред утрешниот самит на НАТО во Брисел, истакна дека Алијансата мора да ја засили поддршката за сите партнери изложени на руски притисок, вклучително и Грузија и Босна и Херцеговина.
„НАТО и неговите партнери одговорија на оваа криза со силна поддршка за Украина и со невидени трошоци за Русија. НАТО дејствуваше брзо и обединето за да ги заштити, одбрани сите сојузници. Стотици илјади сојузнички трупи се во состојба на готовност во земјите-членки. Во Европа моментално се наоѓаат 100.000 американски војници. Дополнителни одлуки ќе донесеме на утрешниот самит. Очекувам дека лидерите ќе се договорат за зајакнување на позицијата на НАТО во сите домени, со големо зголемување на нашите сили на источното крило на Алијансата, на копно, во воздух и на море. Првиот чекор е да се распоредат четири нови борбени групи на НАТО, во Бугарија, Унгарија, Романија и Словачка, заедно со постоечките сили во балтичките земји и Полска. Тоа значи дека ќе имаме осум меѓународни борбени групи на источното крило, од Балтикот до Црното Море. Се соочуваме со нова реалност за нашата безбедност, затоа треба да ја ресетираме нашата одбрана и тоа да го правиме на долг рок. Утре лидерите на НАТО ќе ја повторат нашата поддршка за Украина. „Украина има право на самоодбрана во рамките на Повелбата на ОН, а ние им помагаме на Украинците да го остварат тоа основно право“, рече Столтенберг.
Тој рече дека очекува утре сојузниците да се договорат за дополнителна поддршка која вклучува сајбер безбедност, како и опрема што ќе и помогне на Украина да се заштити од хемиски, биолошки, радиолошки и нуклеарни закани.
„Инвазијата на претседателот Путин е брутална, а човечкото страдање е страшно и болно за гледање. Решени сме да направиме се што можеме за да ја поддржиме Украина, но имаме одговорност да обезбедиме војната да не ескалира надвор од границите на Украина и да нема конфликт меѓу НАТО и Русија, што би довело до уште повеќе смртни случаи и уништување. Очекувам и дека ќе ја зголемиме нашата поддршка за сите партнери кои се изложени на руски притисок, вклучително и Грузија и БиХ. „Работејќи заедно со ЕУ, мора да им помогнеме да го одбранат својот суверенитет“, рече Столтенберг.
Тој повтори дека НАТО дава невидена поддршка за Украина.
Тој рече дека членството на Украина во НАТО не е на агендата на самитот, но помошта за Украина е на врвот на агендата.
„Русија мора да престане да треска со нуклеарно оружје“
Солтенберг ја коментираше и вчерашната изјава на портпаролот на Кремљ, Дмитриј Песков, кој рече дека Русија ќе употреби нуклеарно оружје само доколку се загрози нејзиното постоење.
„Русија мора да престане да штрака со нуклеарно оружје. Тоа е опасно и неодговорно. НАТО е тука да ги заштити и брани сите сојузници, а ние и пренесовме јасна порака на Русија – нуклеарната војна не може да се победи и не може да се започне. Ова само ја нагласува важноста да се стави крај на војната во Украина. Мораме да направиме се што можеме за да спречиме војната да ескалира надвор од границите на Украина и да стане посмртоносна и опасна од она на што сме сведоци денес. Секоја употреба на хемиско, биолошко, нуклеарно оружје радикално ќе ја промени природата на конфликтот, а Русија мора да знае дека никогаш нема да може да победи во нуклеарна војна. „Нивното континуирано штракање со нуклеарно оружје и реторика се во спротивност со она што го кажаа во НАТО и другите формати за спречување нуклеарен конфликт“, рече Столтенберг.
Тој ја истакна важноста на утрешниот самит. „Тоа е вонреден самит во вонредна безбедносна ситуација. Се соочуваме со најголемата безбедносна закана од крајот на Втората светска војна. „Убеден сум дека сојузниците ќе се договорат за сите важни прашања“, рече Столтенберг.
Тој повтори дека НАТО нема да воведе забрана за летови на Украина.
„Рековме дека нема да го сториме тоа бидејќи веруваме дека тоа најверојатно ќе биде поттик за сеопфатна војна меѓу НАТО и Русија. Во тој случај, едноставно треба да бидеме подготвени да собориме руски авиони“, рече Столтенберг.
