Организаторите на Австралија опен ги забранија руските и белоруските знамиња за време на натпреварувањето, бидејќи гледачите донесоа повеќе од едно на трибините на првиот ден од првиот овогодишен Грен слем турнир.
Причината за ваквата одлука е тоа што на натпреварот од првото коло меѓу Русинката Камила Ракимова и Украинката Катерина Баиндл на трибините беше истакнато руското знаме, по што протестираше украинскиот амбасадор во Австралија Васил Мирошниченко.
„Нашата првична политика беше навивачите да внесуваат знамиња, но не можеа да ги користат за да го нарушат натпреварувањето“, се вели во денешното соопштение на Tennis Australia.
Политиката на Австралиската тениска асоцијација имплицира дека на руските и на белоруските играчи им е дозволено да се натпреваруваат на турнирот, но само како „неутрални“ спортисти, односно нивната националност не е наведена во ниту еден официјален распоред или резултати, а знамињата на нивните земји не се прикажуваат ниту на ТВ графика.
