Руската инвазија на Украина влезе во 38. ден. Конвојот на Црвениот крст кој се упатува кон Мариупол во сабота ќе се обиде да евакуира цивили од опколениот украински град, додека руските сили најверојатно ќе се прегрупираат за нови напади во југоисточниот дел на земјата.Украинскиот претседател Володимир Зеленски во видео обраќањето рано наутро предупреди дека руските трупи тргнале кон регионот на Донбас и североисточниот дел во правец на Харков, вториот по големина град во Украина, каде што претходните руски напади сериозно ги оштетиле урбаните области.
„Се надевам дека сè уште може да има решенија за ситуацијата во Мариупол“, рече Зеленски.
ТЕК НА НАСТАНИТЕ ОД МИНУТА ДО МИНУТА
08:04 часот
Руски ракети погодија два града
Руски ракети рано утрото погодија два града во централна Украина, оштетувајќи ја инфраструктурата и станбените згради, изјави лидерот на регионот Полтава, пренесува Ројтерс.
„Проектилот погоди еден од инфраструктурните објекти во Полтава во текот на ноќта. Кременчук. Многу напади на градот наутро“, напиша Дмитриј Лунин во објавата на интернет.
07:15 часот
Денеска нов обид за спасување цивили од Мариупол
Конвојот на Црвениот крст кој денеска патува за Мариупол повторно ќе се обиде да ги евакуира цивилите од опколеното пристаниште.
Се проценува дека околу 100.000 луѓе биле заробени таму без пристап до храна и вода.
07:10 часот
Зеленски: Пред нас се тешки битки
Во ноќното видео обраќање, украинскиот претседател Володимир Зеленски рече дека воената ситуација на истокот на земјата и понатаму е многу тешка. Тој, исто така, рече дека руските трупи на север се повлекуваат „полека, но забележливо“: Но, тој предупреди дека се подготвуваат за нови жестоки напади во Донбас.
„Ни претстојат тешки битки. Не можеме да мислиме дека веќе ги поминавме сите тестови“, рече Зеленски.
Тој, исто така, рече дека повеќе од 3.000 луѓе се евакуирани од опколениот Мариупол.
Руските сили создаваат „целосна катастрофа“, оставајќи мини околу куќите, па дури и телата, изјави украинскиот претседател Зеленски.
„Тие ја минираат целата територија. Зеленски рече дека Украинците треба да почекаат додека не се уверат дека мините се исчистени и оти заканата од гранатирање поминала, пред да се обидат да го продолжат својот нормален живот.
07:06 часот
САД нарачуваат уште 300 милиони долари оружје за Украина
Министерството за одбрана на САД ќе и даде на Украина оружје во вредност од 300 милиони долари, соопшти во петокот Пентагон.
Новиот одбранбен пакет ќе вклучува различни дронови, ракетни системи, оклопни возила, муниција, безбедни комуникациски системи, митралези, медицински материјали и слично.
Владата на САД веќе вети 1,65 милијарди долари помош за Украина откако Русија ја нападна кон крајот на февруари. Од почетокот на минатата година американската помош изнесуваше вкупно 2,3 милијарди долари.
Новата пратка на оружје нема да дојде наскоро бидејќи најавата не се однесува на оружје и системи кои веќе ги поседуваат американските власти, туку на нарачка од производителот.
„Оваа објава го означува почетокот на процесот на склучување договори за обезбедување нови капацитети за вооружените сили на Украина“, соопшти Пентагон.
07:06 часот
Украинците тврдат дека продолжуваат да го контролираат својот воздушен простор
Украинската војска продолжува да го контролира својот воздушен простор, изјави во петокот командантот на воздухопловните сили Микола Олешчук.
Непријателот никогаш не го контролирал и моментално не го контролира украинското небо“, рече Олешчук на Фејсбук.
Руската војска се обиде да ги елиминира украинските воздухопловни сили по почетокот на инвазијата на 24 февруари, но не успеа, според неговата изјава.
Олешук рече дека Русите сè помалку напаѓаат со авиони, а се повеќе со проектили од далечина, пренесува агенцијата dpa.
Тој побара од западните сојузници дополнително оружје за Украина, вклучувајќи борбени авиони и противракетни системи.
07:06 часот
Украина и Русија разменија затвореници
Украина и Русија разменија затвореници во петокот доцна навечер, изјави украинскиот претставник Кирило Тимошенко.
Тој објави дека се ослободени 86 украински војници, но не откри колку Руси се ослободени.
Во објавата на интернет, Тимошенко рече дека размената е резултат на тековните мировни преговори, според Ројтерс.
