Претставникот на Демократската партија на Косово Беким Хаџиу предложи на заедничката седница на парламентите на Албанија и Косовo пратениците од двете држави да се стави и гласање за обединување на двете земји во „Конфедерацијата на албански држави“.
Хаџиу во објава на Фејсбук порача дека е време за важни одлуки.
„Откако Косово прослави 14 години како суверена и независна држава, време е ние, избрани од народот на Косово и Албанија да гласаме на оваа 110-годишнина од независноста на Албанија за обединување во Конфедерацијата на албанските држави. Албанија и Косово да се обедединат во една држава, со една влада, еден сенат и два конгреса. Време е за важни одлуки за нашата нација да го зачуваме албанскиот идентитет и да бидеме заедно онаму каде што припаѓаме – во Европската Унија“ – напиша Хаџиу.
Овој пратеник барањето го упати конкретно до претседателите на парламентите на Косово и Албанија.
– Како претставник на народот, избран за пратеник во Собранието на Косово, ги молам претседателката на Собранието на Албанија,Линдита Николаја и претседателот на Собранието на Косово, Гљаук Коњуфац, да го стават на гласање на седницата на претставниците на Албанија и Косово во Тирана: За обединување на Албанија и Косово во Конфедерацијата на албанската држава – порача тој.
Хаџиу вели дека тоа е вистинскиот начин.
– Тоа е аманет на паднатите борци на албанскиот народ низ вековите, кои паднаа на олтарот на слободата, со идеалот за национално единство – заклучува тој.
Денеска во Албанија се одржува заедничка седница на собранието на Косово и Албанија по повод одбележувањето на 110-годишнината од независноста на Албанија. Седницата започнува во 10:00 часот. Пред присутните се обратија претседателот на Собранието на Албанија и претседателот на косовскиот парламент, како и премиерот на Косово Албин Курти и премиерот на Албанија Еди Рама, како и обраќања на министри и заменици од Приштина и од Тирана.
Освен заедничката седница се очекуваат и други манифестации. Седницата се одржува по повод денот на албанското знаме.
