Американскиот актер Кларенс Гилард Јуниор, ѕвездата на филмовите „Умри машки“ и „Топ ган“, почина на 66-годишна возраст.
Актерот кој одамна му сврте грб на Холивуд, за да се посвети на наставата, долго време беше болен. Сепак, деталите за болеста од која почина Кларенс не се објавени, објави Индипендент.
Поранешната холивудска ѕвезда, позната по хит титулите како „Умри машки“ и „Топ Ган“, како и серијата „Вокер, Тексас Ренџер“, долго време работеше како професор по филмска и театарска уметност на Универзитетот во Невада, на Колеџот за уметности.
„Професорот Гилард беше светилник на светлината и силата. Кога и да го прашавме како е, тој со задоволство кажуваше колку е благословен. Но, ние сме навистина оние кои имавме благослов да бидеме негови колеги и студенти толку години. Ве сакаме и ќе ни недостигате професори“, соопштија од Универзитетот каде ги помина последните години.
Актерот, роден во Вашингтон, пред да глуми во филмови, прво се испробал на телевизија. Но, интересно е што првично сакал да биде пилот и поминал една година на Академијата на воздухопловните сили пред да се запише на студии по глума. Тој го имаше своето деби на големото платно во хит филмот „Топ Ган“ со Том Круз во 1986 година.
Во друг блокбастер наслов „Умри човек“ само неколку години подоцна, тој играше заедно со Брус Вилис.
Играше и во серијата „Метлок“, а една од улогите што му ја одбележаа актерската кариера е онаа во серијата „Вокер, Тексас Ренџер“, покрај Чак Норис. Тој играше во речиси 200 епизоди од оваа серија, која престана да се емитува дури во 2001 година по десет сезони.
Но, пет години подоцна му сврте грб на Холивуд и се приклучи на Катедрата за театар на Универзитетот во Невада, Лас Вегас. Освен како професор, работел и како продуцент и режисер.
