Милорад Додик, претставникот на босанските Срби во претседателството на БиХ денеска им го покажа средниот прст на новинарите од својата службена кола, кога пристигнуваше пред државното Обвинителство за да даде исказ. На новинарката на Н1 која го праша дали планира да им се извини на медиумите ѝ одговори:
– Со години некои во медиумите заедно со странскиот фактор ме бркаат мене и моето семејство. Секој божји ден толку многу лаги се кажуваат за мене што би можел да ги објавам собраните тапии на вашите колеги. Ако очекуваат да им аплаудирам, жал ми е, но нема. Не можам да им аплаудирам на непрофесионалци. Како јавна личност имам обврска да трпам критика, но немам обврска да трпам лаги. Мојата реакција од денес е мотивирана кон луѓето кои со години шират нетрпеливост кон мене и моето семејство. Жал ми е за професионалните новинари кои чесно си ја вршат работата, но има и насилници кои се врзани за пропаганда која се шири. Некои од вашите колеги немаат одговорност за долгорочно богохулење. Мојата реакција беше кога ги препознав новинарите и снимателите на ТВ БН. Средниот прст беше насочен кон нив, апсолутно, не кон вашиот медиум – вели Додик.
Во однос на тоа што го испрашувале во Обвинителството Додик вели дека се работи за организирана хајка:
– Целосно демантирам сѐ што ми беше донесено таму. Ми беше претставено нешто што се случи пред 17 години. Целосно демантирам сѐ што е поврзано со инкриминацијата на Обвинителството. Точно е дека склучив заем кај Павловиќ Банка за повеќе од еден милион марки за купување недвижен имот во Белград. Подоцна, рокот беше поместен на 20 години отплата. Ратата од кредитот се отплаќа и денес, па би било лудост некој да го почитува тоа што го тврди, а ратите од кредитот да ги плаќа 17 години. Заемот го враќам не само по основ на рати, туку и по однос на закупнината на тој објект во Белград. Ме оштетија со тоа што по отворањето на истрагата против луѓето во Павловиќ Банка, таквиот договор беше раскинат и оттогаш ги исплаќав ратите по основ на плата – рече Милорад Додик на почетокот на конференцијата.
Тој додава дека за другите детали ќе се изјасни со тоа што ќе достави документација.
– За другите детали ќе одлучуваме преку документација следниот пат. Инкриминацијата постои и таа е лажна, тоа е политички процес кој се организира под директно влијание на странските амбасади. Една од тие амбасади е и британската, чиј амбасадор на блог изјави дека „може да се разоткрие ситуацијата околу Павловиќ банка“. Каква врска има британскиот амбасадор? Ова е директна наредба до Обвинителството – заклучува Додик.
