Климатските промени веќе во голема мера влијаат на животот на луѓето на Земјата. Екстремните временски појави како суша, топлотни бранови или поплави се јасен знак дека нешто не е како што треба.
Студијата објавена во списанието Nature Climate Change открива шокантни податоци за тоа што не чека во не толку далечна иднина. Меѓународен тим експерти ги проучувал податоците од научните студии објавени во изминатите неколку децении, кои се занимаваат со човечки патогени кои се под влијание на „климатските промени“ во одредено време и простор, пишува Zimo.hr.
Тие успеаја да создадат интерактивна мапа со неверојатни 1.006 врски помеѓу човечките патогени и 10 опасности поврзани со климата – од обилни дождови до топлотни бранови.
Она што го открија е шокантно, во најмала рака. Дури 58 отсто од болестите што ги земале во предвид се шират благодарение на климатските промени. Иако фактот дека климатските промени влијаат на способноста за ширење на разни болести е веќе добро познат, ова е првпат некој всушност да ги брои овие болести и да ги поврзе со различни климатски промени.
Четири клучни начини за влијанието на климатските промени
Во коментарот на истражувањето, научниците издвоија четири клучни начини на кои климатските промени влијаат на човечките патогени.
Првите две опишуваат како промените во климата ги приближуваат патогените до луѓето. На пример, обилните и долготрајните дождови им овозможуваат на комарците да се размножуваат во близина на човечки живеалишта, а топлотните бранови ги поттикнуваат луѓето да се разладуваат во вода, што доведува до можност за заразување со разни болести кои се пренесуваат преку вода.
Третиот начин ја истакнува можноста климатските промени да се директно поврзани со зајакнувањето на самите патогени. Тие нагласуваат дека зголемувањето на температурата всушност им помогнало на патогените да се прилагодат на топлината, а застоената вода што останува по поплавите и обилните дождови се користи за размножување на комарци кои можат да бидат носители на разни болести.
Но, можеби најважниот е четвртиот начин, кој се однесува на тоа како климатските промени влијаат на луѓето и нивната способност да се одбранат од болести. Поради екстремни временски услови и катастрофи, луѓето во одредени области се принудени да живеат во пренаселени места каде хигиенските услови се лоши. Ако на тоа се додаде и лошата исхрана во вакви случаи, јасно е дека човечкото тело не може доволно добро да се избори со болеста.
Научниците не потсетуваат дека климатските промени, во последните 50 години, се поврзани со зголемување на болести поврзани со временски непогоди. Според податоците на Светската метеоролошка организација, во периодот од 1970 до 2019 година, повеќе од два милиони луѓе загинале поради екстремни временски услови – суша, бури, поплави и екстремни температури.
„Наивно е да се мисли дека ќе се прилагодиме на ова. Нема начин, со толку многу болести и толку различни начини на пренесување, целосно да се прилагодиме“, предупреди водачот на истражувањето и професор на Универзитетот Маноа на Хаваите, Камило Мора.
Климатските промени претставуваат значителна закана за човечките животи, здравје и благосостојба. Нашата карта покажува колку сериозна може да биде оваа закана. Нашиот став е дека ако сакаме да го намалиме ризикот, човештвото мора да ги запре емисиите на стакленички гасови кои го промовираат глобалното затоплување, напишаа авторите на студијата на крајот од коментарите во The Conversation.
