Претседателот на Црна Гора, Мило Ѓукановиќ, со сопругата и двајца службеници од Полициската управа кои го обезбедуваат, од 30 декември до 7 јануари престојуваше во луксузниот хотел „Grand Hotel des Bains Kempinski“ во монденското швајцарско одморалиште Сент Мориц, објави „Вијести“. Министерството за внатрешни работи соопшти дека трошоците за службеното патување на нивните службеници изнесуваат над 11.000 евра.
Трошоците за обезбедување на заштитени лица се на товар на државата, пренесува „Вијести“.
„Од вкупната сума, 8.931,42 евра се однесуваат за хотелско сместување, а трошоците за дневници изнесуваат 2.209,20 евра“, се вели во одговорите на МУП.
На веб-страницата на хотелот има информација дека за датумите во кои престојувал Ѓукановиќ, крајот на 2022 година и почетокот на оваа година, најевтиното сместување може да се најде за околу 1.800 евра за ноќевање во соба од 25 метри квадратни, додека апартманите почнуваат од 2.500 евра од ноќ до над 13.000 евра за претседателскиот апартман. Хотелот нуди и „резиденции“ кои почнуваат од 5.000 евра за ноќ, а најскапата е 20.000 евра. Исто така, не е можно да се користи просторијата помалку од седум дена на тие датуми.
Во имотниот лист на Ѓукановиќ се гледа дека пријавената плата на претседателот е околу 2.200 евра месечно, додека неговата сопруга Лидија зема нешто повеќе од 900 евра.
Ѓукановиќ, кој е и лидер на Демократската партија на социјалистите, замина во Швајцарија на 30 декември по работната посета на Истанбул.
Со образложение дека имал „дипломатска средба“, од најголемиот турски град полетал на северот на Италија, каде што се симнал, а владиниот авион се вратил во Подгорица.
Од Владата на Црна Гора претходно неофицијално за „Вијеста“ изјавија дека Ѓукановиќ навистина побарал авионот да лета на релација Подгорица-Истанбул-Бергамо-Подгорица и дека во барањето е наведено дека причината за тоа е дипломатска средба.
Кабинетот на претседателот на Црна Гора не ја информира јавноста кој дипломат или странски функционер Ѓукановиќ наводно се сретнал во Бергамо или каде било во Италија.
