Вевчанскиот карневал, еден од најпознатите брендови на земјава, ќе се одржи традиционално на 12, 13 и 14 jануари, соопштија организаторите.
Пишани извори сведочат дека карневалот во Вевчани е стар најмалку 1.460 години, но постојат археолошки наоди кои упатуваат на податоци дека карневалот постои барем 2.200 години.
Денес карневалот е интересно и необично преплетување на пагански со христијански обичаи. Традиционално, учесниците се обидуваат да избегнат воведување на современи карневалски елементи, но веќе со години наназад има и богата музичка програма.
Традиционалното дефиле на маските, кое завршува со палење на маските, ќе се одржи на 14 јануари.
„Вевчанските маски покажуваат какви не треба да бидат луѓето. Ако видите грубост, пораката е не бидете груби. Ако видите вулгарност, пораката е не бидете вулгарни. Едноставно, она што е негативно во едно општество и во секој сегмент на општественото живеење, ќе го видите токму низ маските на дефилето на 13 и на 14 јануари“, порача градоначалникот на општина Вевчани, Спасе Кочоски, на денешната прес-конференција.
Василичарите од Горна и Долна Маала, покрај традиционалните маски на Глупи Август, Зетот и Невестата и Ѓаволите, ќе продефилираат и со останатите маски кои претставуваат спој на архаичноста, таинственоста и на современото.
Вевчанскиот карневал се изведува во чест на верскиот празник Свети Василиј Велики – заштитник на вевчанските василичари, на вевчанци и на Вевчани. По своите специфичнии особини се разликува од сите други карневали во светот.
Карневалот е признат од страна на Федерацијата на европските карневалски градови, со својата богата културна и историска вредност и привлекува илјадници домашни и странски посетители.
Извор: Мета
