Од воздух, по копно и во вода, утрово продолжи потрагата по третиот исчезнат македонски државјанин на првиот крак на Халкидики, а според информациите на дописничката на МИА од Атина, во спасувачката акција на крајбрежната служба на Грција се вклучени три патролни бродови, возила и еден авион.
Спасувачката акција започна во саботата попладне, траеше во изминатите денови, а продолжи и утрово. Освен крајбрежната служба во потрагата учествуваат и спасувачки тимови и волонтери.
Според грчките медиуми, спасувачките тимови се очекува да употребат и подводен дрон.
Од нашето Министерство за надворешни работи синоќа соопштија дека во вечерните часови во Грција пристигнала и мајката на исчезнатиот М.Ј. која била пречекана од Генералниот конзул во Солун, кој продолжува одблиску да комуницира со грчките надлежни авторитети и е на располагање за секаква потребна асистенција.
Според информациите на МИА, спасените македонски државјани се во добра здравствена состојба, 25-годишниот Васил вчера бил отпуштен од болницата на Халкидики, додека пак 30-годишниот Иван е хоспитализиран во Солун.
Спасувачката акција и потрагата започнаа во саботата во попладневните часови, кога тројцата државјани на Македонија влегле во морето на плажата Мити во Посиди на првиот крак на Халкидики, а поради лошото време се нашле во беспомошна ситуација и се оддалечиле од брегот.
Дел од присутните на плажата забележале дека капачите ги снемало и веднаш ја информирале крајбрежната служба, по што започнала акцијата.
Еден од тројцата пријатели, 25-годишниот Васил бил спасен во саботата по поминати околу два часа во вода, додека пак во неделата, по околу 19 часа во морето беше пронајден и 30-годишниот Иван.
