Ајкула нападна и уби патник од американски брод за крстарење кој нуркал во водите околу Бахамите во вторникот, соопштија властите.
„Ова е 58-годишна жена од Пенсилванија, а нападот се случи на популарно место за нуркање во близина на Грин Кеј на северот на Бахамите“, изјави портпаролката на полицијата Крислин Скипингс.
Royal Caribbean International соопшти дека лицето починало откако било пренесено во локална болница. Констатирано е дека туристот бил на седумдневно патување.
Повеќето напади на ајкули на Карибите се случиле на Бахамите, со два пријавени во 2019 година, од кои еден бил фатален. Во инцидентот, три ајкули нападнаа жена од Калифорнија во близина на островот Роуз, кој е на само половина милја од местото на нападот во вторникот.
Во декември 2020 година, беше пријавен фатален напад на ајкула на француската карипска територија Св. Мартин, што е прв ваков инцидент во тој регион.
Мајкл Хејтхаус, морски биолог на Меѓународниот универзитет во Флорида во Мајами, рече дека големиот број напади на Бахамите веројатно е поврзан со фактот дека има многу луѓе во водата во областа.
Минатата година имаше 137 напади од ајкула
Тој изјави дека на Бахамите има различни видови ајкули, од кои повеќето не обрнуваат внимание на луѓето, освен биковите и тигрестите.
„Тие стануваат многу големи и јадат голем плен“, рече Хејтхаус, додавајќи дека ајкулите имаат неверојатни сетилни системи и можат да бидат привлечени од храна, звуци и мириси во водата.
Но, генерално, нападите од ајкули остануваат ретки, нагласи Хејтхаус.
Во светот минатата година имало 137 напади на ајкули, од кои 73 биле неиспровоцирани, според Меѓународното досие за напад на ајкула.
