Американскиот секретар за одбрана Лојд Остин ја бранеше реакцијата на САД на војната во Украина во жестока дебата со републиканскиот конгресмен кој го обвини Пентагон дека ги преценува воените способности на Русија.
-„Дали ви текна дека Русија не ја прегази Украина поради тоа што го направивме? И поради она што го направија нашите сојузници? Дали некогаш сте размислувале за тоа?“, реторички го праша Остин пратеникот Мет Гаец во Комитетот за вооружени служби на Претставничкиот дом.
Остин и други американски официјални лица велат дека поддршката на САД за украинските сили, заедно со силната волја на Украина да се спротивстави, ги спречила плановите на Русија да постигне брза победа во војната која сега влезе во својата шеста недела.
Генералот Мајк Мили, претседател на Здружениот Генералштаб, рече дека конфликтот во Украина може да трае со години. „Мислам дека ова е конфликт кој ќе трае и мислам дека ќе трае со години“, изјави Мили на истиот комитет.
Тој додаде дека „НАТО, САД, Украина и другите сојузници и партнери кои ја поддржуваат Украина ќе бидат вклучени во ова уште некое време“.
Во источна Украина сепаратистите се борат со руска поддршка од 2014 година, а во конфликтот загинаа околу 15.000 луѓе.
