Американската актерка Ен Хеч во моментот е во стабилна состојба по сообраќајна несреќа во Лос Анџелес, пренесува магазинот „Пипл“.
Претставникот за медиумите на актерката рече дека нејзиното семејство во овој момент бара приватност.
„Нејзиното семејство и пријателите бараат да се молите за неа и да ја почитувате нејзината приватност во овој тежок момент“, рече тој.
За потсетување, поранешната партнерка на водителката Елен Деџенерис и добитничка на наградата Еми, во петокот наутро околу 11 часот удрила со својот Мини Купер во гаража во населбата Мар Виста. Автомобилот и куќата се запалиле, а Хеч била извлечена од урнатините и ставена на носилки пред итно да биде пренесена во болница.
Иако автомобилот е регистриран на Ен Хеч, се уште не е потврдено дали актерката го управувала возилото. Медиумите наведуваат и дека Хеч побегнала од местото на друга несреќа пред да удри со своето возило во гаражата. Наводно поминала низ знак за стоп и возела непрописно.
Актерката претрпела сериозни изгореници и била интубирана.
Хеч е позната по улогите во филмовите како „Психо“, „Дони Браско“ и „Седар Рапидс“, а меѓу 1997 и 2000 година беше во романтична врска со водителката Елен Деџенерис.
ФОТО: Јутјуб
