22.9 C
Ohrid
Friday, August 12, 2022

Кое е оружјето што го уби само Ал Завахири во полна куќа со луѓе?

НАЈЧИТАНО

Американскиот претседател Џозеф Бајден ја објави смртта на лидерот на Ал Каеда Ајман ал Завахири, но информациите за оружјето користено при таа ликвидација не се целосно познати. Како што претходно се шпекулираше, станува збор за моќна ракета позната како „нинџа бомба“.

Во својот кус говор од Белата куќа, Бајден спомена дека нападот бил извршен со дрон. Американски функционер им изјави на новинарите под услов да остане анонимен дека дронот фрлил два проектили „Хелфајр“ и дека нема потреба од американско воено присуство во земјата.

Кабул, од друга страна, првично го негираше нападот со беспилотно летало, мислејќи на „проектил“ што погоди „празна куќа“ пред да признае во вторник наутро дека американските беспилотни летала го извршиле воздушниот напад, објави француски „Лемонд“.

Немаше знаци на експлозија или колатерални жртви во објектот, иако семејството на лидерот на Ал Каеда беше присутно во куќата. Сите овие индиции укажуваат на употреба на таен проектил, за кој се верува дека бил вклучен во други целни убиства на екстремистички лидери, но чија употреба Пентагон никогаш не ја потврдил.

Ајман Ал Завахири беше убиен на 31 јули кога два проектила погодија куќа во Кабул. Трикатната куќа се наоѓа во Шерпур, богата област на авганистанската престолнина, каде што неколку вили се окупирани од високи талибански функционери и команданти.

Водачот на Ал Каеда бил забележан „повеќе пати и во подолг временски период на балконот, каде наводно бил убиен во нападот“, додаде американскиот функционер. Во зградата немало траги од експлозија, а во нападот нема повредени, пренесе Би-Би-Си.

Во куќата биле членови на семејството, но не биле повредени. Фотографиите покажуваат дека прозорците на првиот кат се скршени, но останатиот дел од куќата, вклучително и прозорците на другите катови, остана недопрени.

Што е ракетата „Хелфајер Р9X“?

Американските власти ја спомнаа употребата на ракетите „Хелфајр“, а особено на „Хелфајр АГМ-114“, познати по нивните силни експлозии и честопати колатералната штета што ја предизвикуваат, пренесе Си-Ен-Ен.

Трагите оставени по американскиот напад на куќата сугерираат, како што истакна американскиот поранешен истражувачки новинар Џеј Хенкок во твит, дека ЦИА користела друг тип на проектили – „Хелфајер Р9X“.

Тој проектил е познат како „нинџа бомба“ и е развиен под администрацијата на Барак Обама. Тој нема експлозивно полнење, а опремен е со шест сечила кои се активираат пред ударот, уништувајќи ја целта без никаков ефект на експлозија.

 

Употребата на „Р9X“ никогаш не била официјално признаена од Пентагон или ЦИА, двата американски ентитета одговорни за насочени убиства на екстремистички лидери. Ова мистериозно оружје го доби името „летечки џинсу“ по познатата ТВ реклама од 1980-тите за кујнските ножеви од брендот „Ginsu“, кои честопати можеа да ги пресечат алуминиумските конзерви и сепак да останат совршено остри.

Преседани, но без потврда

Постоењето на ваков проектил првпат беше споменато во март 2017 година, кога друг лидер на Ал Каеда, Абу Кеир Ал-Масри, беше убиен од напад на беспилотно летало додека патувал со автомобил во Сирија.

Фотографиите покажуваат голема дупка низ покривот на автомобилот. Внатрешноста на возилото била растргната, но предниот и задниот дел од автомобилот изгледале недопрени.

Истрагата на Вол Стрит Журнал од 2019 година ја потврди неговата употреба од страна на Американците по смртта на Џамал ​​Ал-Бадави, за кој се веруваше дека е вториот човек во самоубиствениот напад на УСС Кол во октомври 2000 година.

Американските власти ја опишаа ракетата како „наковална што паѓа од небо со полна брзина“. Овие проектили, наводно, веќе биле користени во напади во Либија, Сирија, Ирак, Јемен и Сомалија.

- Advertisement -spot_img
- Advertisement -spot_img
- Advertisement -spot_img

СПОРТ

НАЈНОВО