Потрагата по формулацијата на референдумското прашања во врска со одбивањето на преговарачката рамка на Македонија со Европската Унија би можела да потрае до септември, но и да се одолжи до почетокот на грејната сезона. Ова за Плусинфо беше потврдено од неколку извори блиски до опозицијата.
Еден од изворите открива дека е премногу рано да се говори за контурите на референдумското прашање, а засега тече консултацијата на опозициските партии со експертите. Дури од септември ќе почне вистинската работа за подготовките околу референдумот, а неизвесно е дали и тогаш ќе биде формулирано прашањето.
Според тоа што го дознаваме од опозициските кругови, во моментов главна дилема претставува како да се формулира прашањето, за во исто време да се задржи проевропската агенда на Македонија, но и да се одбие т.н. француски предлог, кој влезе во преговарачката рамка со ЕУ.
Владата ќе се обиде да го избегне референдумот
Од друг извор откриваат дека формулацијата на референдумското прашање ќе се бара меѓу насоките што Собранието ѝ ги даде на Владата, меѓу кои и препораката да ја прифати преговарачката рамка со ЕУ. Нашиот извор открива тука ќе се води и правната битка на релација власт – опозиција.
Се шпекулира да Владата ќе се обиде да избегне одржување на референдум, со образложение дека Собранието не е надлежно за преговарачката рамка со ЕУ. На ова опозицијата ќе возврати со аргументот дека Собранието, од кое претходно беше побарано мислење, веќе се изјаснило за рамката и не би смеело да му се искрати можноста да се изјасни за свикување референдум.
И вториот извор претпоставува дека нема набрзо да биде изнесена формулацијата на прашањето во јавноста, бидејќи е потребно уште време за консултации и разговори со експерти.
Засега може да се претпостави дека иницијативата на ВМРО-ДПМНЕ за организирање на референдум, покрај од коалициските партии од опозицијата, ќе добие поддршка и од Левица.
Пендаровски за залета, па ретерира
За време на викендот претседателот Стево Пендаровски го смени ставот околу референдумот, откако прво го формулираше и можното референдумско прашање, за потоа да каже дека нема никакво разбирање за предлогот на ВМРО-ДПМНЕ, како и дека лидерот на опозицијата Христијан Мицкоски сака преку организирањето на референдумот да го мобилизира партиското членство.
„Стево Пендаровски имаше можност да биде претседател кој ќе биде заштитник на македонските интереси, доколку останеше цврст на ставот за референдум, но тој се премисли очигледно под притисок на владата. Пендаровски беше дециден во поддршката, за по неколку дена да ретерира и да зборува спротивно од тоа што еднаш веќе го изјавил. Толку ли е голем притисокот врз Пендаровски, па мораше да го менува својот став, а со тоа и да ја понижи институцијата претседател“, се вели во реакцијата испратена од ВМРО-ДПМНЕ.
Дали сте за клавање кафе со можност после тоа да клајме уште кафиња?
Отсуството на вистинска дебата меѓу чинителите на политичките партии во Македонија доведе до тоа расправата за референдумот и за референдумското прашање да се води на социјалните мрежи, често и со шеговити коментари.
Еден од најпознатите инфлуенсери од Македонија, Божидар Божиновски, ја препорачува следната формулација: „Дали сте за клавање кафе со можност после тоа да клајме уште кафиња?“
