Претседателот на Србија Александар Вучиќ денеска ги прими акредитивните писма на новоименуваниот амбасадор на Украина, Володимир Толкач и најави дека Србија ќе учествува во обновата на градовите во Украина, соопштија од кабинетот на Вучиќ.
Вучиќ изрази искрено жалење за ситуацијата во Украина и истакна дека Србија е посветена на почитување на принципите на територијален интегритет и суверенитет на државите, како еден од основните принципи на меѓународното право, како и на почитување на територијалниот интегритет на Украина, соопшти неговиот кабинет.
Тој додаде дека Србија е изложена на непринципиелниот однос на еден дел од светот кога станува збор за еднострано прогласената независност на Косово и се заблагодари на Украина за почитувањето на територијалниот интегритет на Србија. Тој посочи дека Србија обезбедила најдобри можни услови за цивилите бегалци од Украина, како и сите права на дозволи за престој и работа, во согласност со правилата на Европската унија, дури и на повисоко ниво. Тој најави и дека наскоро со амбасадорот Толкач ќе ги посети украинските бегалци во нашата земја, како и дека Србија ќе учествува во обновата на градовите во Украина. Тој, исто така, повтори дека Србија, во согласност со својата доследна политика, е посветена на мирно решавање на споровите и во таа смисла ги поддржува сите напори насочени кон преговори“, соопшти Кабинетот.
Толкач се заблагодари за хуманитарната помош што Србија ја дава на загрозените украински цивили, како и за финансиската помош.
