Евгениј Пригожин, шефот на руската платеничка група Вагнер, денеска ги обвини единиците на регуларната руска армија дека се повлекле 570 метри северно од градот Бахмут во источна Украина, оставајќи ги крилата на сопствените борци изложени на украински напади, пренесува Ројтерс.
Новинарите на Ројтерс не можеа да го потврдат неговото тврдење, а немаше коментар од руското Министерство за одбрана.Силите на Вагнер, со одредена поддршка од редовната армија, го предводеа нападот врз Бахмут во последните месеци, една од најкрвавите и најдолгите битки во војната, која Москва ја нарекува „специјална воена операција“.
Пригожин, кој постојано го обвинуваше врвот на руската армија дека не прави доволно за да ги поддржи неговите борци, побара од Министерството за одбрана да стори сé што може за да ги заштити страните на градот по „повлекувањето“.
„За жал, единиците на руското Министерство за одбрана се повлекоа на 570 метри северно од Бахмут, откривајќи ги нашите крила“, рече Пригожин во говорната порака.
„Апелирам до највисокото раководство на Министерството за одбрана – јавно – бидејќи моите писма не се читаат“, рече Пригожин.
„Ве молиме, не се откажувајте од крилата“, рече тој, обраќајќи им се на рускиот министер за одбрана Сергеј Шојгу и Валери Герасимов, началник на Генералштабот.
Групата Вагнер изјави дека го освоила најголемиот дел од уништениот град, иако со огромни жртви.
Во меѓувреме, украинските власти тврдат дека украинските сили ја повратиле територијата околу Бахмут во последните денови.
Според Ројтерс, Москва го гледа Бахмут, град со околу 70.000 жители пред војната, како потенцијален чекор кон заземање на остатокот од источниот индустриски регион Донбас, кој граничи со Русија.
