Бизнис

Синдикатите бараат веднаш да се повлече одлуката за поскапување на струјата

Синдикатите и здруженија од земјава најостро реагираат на одлуката на Регулаторната комисија за енергетика за поскапување на струјата за 7,4 проценти и бараат таа веднаш да биде повлечена.

„Револтира што одлуката се носи во екот на најголемата криза од поновото време, кога илјадници луѓе остануваат без работа или добиваат намалување на платите, како и во период кога се обелоденуваат разни малверзации од страна на фирми кои добивале државна помош, а не исплаќале плати на вработените. Со ваква штетна предлог одлука уште еднаш се потврдува дека најголемиот удар од кризава ќе биде врз економски најранливите и работниците“, се вели во соопштението од Самостојниот синдикат на новинарите и медиумските работници (ССНМ).

Оттаму посочуваат дека револтира образложението на претседателот на Регулаторната комисија за енергетика, дека цената морала да се покачи, поради намалените приходи на енергетските компании.

„Одлуката се носи и во пост-изборен период, кога не е конституирано Собранието и нема избрано нова Влада, поради што е спорен и нејзиниот легитимитет, бидејќи ова не е техничка одлука. Ова е политичка одлука, со сериозни политички и социјални последици, која ќе ги засегне сите граѓани на оваа држава на долг период“, стои во соопштението.

Од ССНМ укажуваат и дека многу европски држави во кризава донеле одлуки со кои ги одложиле или ги покриле сметките за струја за сиромашните граѓани, или пак ја намалиле цената на струјата.

– Нашата држава, која има највисока сиромаштија и невработеност во цела Европа, има уште поголема обврска да донесе некоја таква мерка, наместо да покачува цени. Поради сето ова, бараме Регулаторната комисија за енергетика веднаш да ја повлече Одлуката за поскапување на струјата!, се подвлекува во соопштението.

Потписници на Повелбата за солидарност и здруженијата и организациите за заштита на човековите и работничките права се Синдикат на македонската дипломатска служба (СМДС), Синдикат на работниците од управата, правосудните органи и здруженијата на граѓани (УПОЗ), Самостоен синдикат на новинарите и медиумските работници (ССНМ), Синдикат на културата на Република Македонија (СКРМ), Конфедерација на синдикалните организации на Македонија (КСОМ), Независен академски синдикат (НАкС), Левичарско движење Солидарност, Хелсиншки комитет за човекови права, Здружение на граѓани Гласен текстилец, ЈАДРО – Асоцијација на независната културна сцена и Субверзивен фронт.

Сите авторски права се задржани. Преземањето на вести исклучиво со договор со издавачот, и задолжително поставување на Hyperlink

Поврзани вести

Костас А. Караманлис: Ако биде потребно ќе играме на картата на вето за интеграција на соседите во ЕУ

saso user

За УПОЗ неприфатлив предлогот за намалување на платите на административците

saso user

Се зголеми за шест отсто цената на нафтата минатата недела

saso user