Култура Урбани вести

Миленковиќ ќе си замине од Охрид со бисерни манжетни од Филеви

Охрид е прекрасен. Не сум знаел дека е толку уникатен и единствен, едноставно сум одушевен, рече познатиот виртуоз на виолина Стефан Миленковиќ од Србија при неговата прошетка низ градот со професионален туристички водич.

Тој и неговиот колега, пијанистот Владимир Милошевиќ, со кого вечерва ќе имаат концерт во црквата „Света Софија“, беа воодушевени од културно-историското богатство во стариот дел на градот, соопшти Дирекцијата на „Охридско лето“.

– Многупати сум бил во Охрид, сум настапувал на концерти, но никогаш не сум имал можност да прошетам и да ги слушнам овие факти за 365-те цркви, за првиот карантин во Европа, за најстариот музеј и универзитет пред Болоња, за светите Климент и Наум. Среќен сум што имав ваква прилика овозможена од фестивалот „Охридско лето“ – рече Миленковиќ.

Пијанистот Милошевиќ додаде дека и тој бил во Охрид, но никогаш не прошетал со професионален туристички водич.

– Ова е прекрасна можност да се запознае културата, традицијата и историјата на овој толку посебен, прекрасен град. Пресреќен сум што имав ваква можност – рече Милошевиќ.

Со голем интерес двајцата врвни музичари ја слушнаа и вековната приказна за охридските бисери од семејството Филеви. Михајло Филев како добар домаќин им подари бисерни манжетни за спомен од Охрид.

– Одушевен сум од охридските бисери и начинот на нивното производство. Многу сум благодарен за овој подарок и секаде ќе раскажувам за гостопримството во Охрид – рече Миленковиќ.

Фестивалот „Охридско лето“ оваа година првпат воведе туристички водич за уметниците. Целта е врвните светски музичари и актери да ја слушнат приказната за древниот Охрид и да понесат и споделат незаборавни спомени.

Сите авторски права се задржани. Преземањето на вести исклучиво со договор со издавачот, и задолжително поставување на Hyperlink

Поврзани вести

Музичката индустрија денеска молчи во чест на убиениот Џорџ Флојд

saso user

На Антички во Охрид поставена спомен-плоча за Горан Стефановски (ФОТО)

saso user

ОДБЕЛЕЖАНА ГОДИШНИНАТА ОД СМРТТА НА ХРИСТО УЗУНОВ

saso user